و بسطت مملكتلرينه وقوف تام اولمقله فن جليل القدر تاريخك بالجمله معتبرات و مفصلاتنه امرار نظر . و مهرهء مورخينك نام و نشاننى كوش ايتمدكلرى نيجه نسخهء ناديده‌يى مطالعه بيوردقلرى مقرر اولمغين اول مقوله خباياى زوايادن سابقا منظور نظر اكسير اثرلرى اولان ميرزا شاهرخ سلطان « 1 » زماننده رسالتله مملكت ختايه كيدن خواجه غياث الدين نقاشك روزنامچه‌سى واقع حاله موافق و نفس الامره مطابق بر نسخهء نادره اولديغندن ناشى تعميما للفائده ترجمه اولنمسنى بو ربيب خوان نعمت و غريق درياى احسان بىمنتلرى چلبىزاده بنده‌لرينه فرمان بيورمالريله بر موجب « المأمور معذور » بضاعهء ناچيز و عدم استعداد و تمييز ايله حسب القدره ترجمه سنه تشمير ساعد اهتمام قلندى :

--> ( 1 ) ميرزا شاهرخ سلطان - 779 سنه سنده تولد ايتمشدر پدرى مشهور امير تيمورك حياتنده 779 سنه سنده حاكم خراسان اولمشدى 807 سنه سنده پدرى وفات ايلدكده سلطان سلاطين ايران و توران اولدى . خراسانى پاى تخت ايدرك پدرندن اول سكز و پدرندن صكره‌ده قرق اوچ ييل كه جمعا اللى بر ييل امارت و حكومت ايتدى . 850 سنه سنده رى شهرنده وفات ايتمشدر . خيرخواه ، مقتدر ممتزج موفق بر پادشاه ايدى . شو بيت زادهء طبيعتيدر . تو كار زمين رانكو ساختى * كه با آسمان نيز پرداختى